ਨਸ਼ਾ ਛੁਡਾਊ ਕੇਂਦਰ ”ਚ ਨੌਜਵਾਨਾਂ ਨੂੰ ਦਵਾਈ ਦੀ ਥਾਂ ਪਰੋਸ ਰਹੇ ਤੰਬਾਕੂ, ਸ਼ੋਸ਼ਣ ਤੋਂ ਇਲਾਵਾ ਹੁੰਦੀ ਹੈ ਕੁੱਟਮਾਰ

ਸਿਹਤ ਵਿਭਾਗ ਵੱਲੋਂ ਫੜੇ ਗਏ ਗੈਰ-ਕਾਨੂੰਨੀ ਨਸ਼ਾ ਛੁਡਾਊ ਕੇਂਦਰ ਤੋਂ ਇਲਾਵਾ ਨਾਜਾਇਜ਼ ਚੱਲ ਰਹੇ ਸੈਂਟਰ ‘ਚ ਨੌਜਵਾਨ ਅਤੇ ਬੱਚਿਆਂ ਦਾ ਸਰੀਰਕ ਅਤੇ ਮਾਨਸਿਕ ਸ਼ੋਸ਼ਣ ਕਰ ਰਹੇ ਹਨ। ਸੈਂਟਰ ’ਚ ਦਵਾਈ ਦੀ ਥਾਂ ’ਤੇ ਨੌਜਵਾਨਾਂ ਨੂੰ ਥਾਲੀ ਵਿਚ ਪਰੋਸ ਕੇ ਤੰਬਾਕੂ ਵਰਤਾਇਆ ਜਾ ਰਿਹਾ ਹੈ। ਕਈ ਕੇਂਦਰਾਂ ’ਚ ਤਾਂ ਨੌਜਵਾਨਾਂ ਨੂੰ ਰੋਟੀ-ਪਾਣੀ ਅਤੇ ਦਵਾਈ ਦੇ ਬਦਲੇ ਉਨ੍ਹਾਂ ਦੀ ਕੁੱਟਮਾਰ ਕੀਤੀ ਜਾਂਦੀ ਹੈ। ਇਹ ਖੁਲਾਸਾ ਨਸ਼ਾ ਵਿਰੋਧੀ ਲਹਿਰ ਦੇ ਮੁੱਖ ਸੰਸਥਾਪਕ ਅਤੇ ਉੱਘੇ ਸਮਾਜ ਸੇਵਕ ਪੂਰਨ ਸਿੰਘ ਸੰਧੂ ਰਣੀਕੇ ਵੱਲੋਂ ਕੀਤਾ ਗਿਆ।
ਸਮਾਜ ਸੇਵਕ ਪੂਰਨ ਸਿੰਘ ਸੰਧੂ ਰਣੀਕੇ ਨੇ ਦੱਸਿਆ ਕਿ ਗੁਰੂ ਕੀ ਨਗਰੀ ਵਿਚ ਥਾਂ-ਥਾਂ ’ਤੇ ਖੁੱਲੇ ਨਾਜਾਇਜ਼ ਪ੍ਰਾਈਵੇਟ ਨਸ਼ਾ ਛੁਡਾਊ ਕੇਂਦਰ ਅੱਜ-ਕੱਲ੍ਹ ਨੌਜਵਾਨਾਂ ਲਈ ਸ਼ਰਾਪ ਬਣਦੇ ਜਾ ਰਹੇ ਹਨ। ਮਾਪੇ ਆਪਣੇ ਬੱਚਿਆਂ ਦਾ ਨਸ਼ਾ ਛੁਡਾਉਣ ਲਈ ਇਨ੍ਹਾਂ ਪ੍ਰਾਈਵੇਟ ਨਸ਼ਾ ਛੁਡਾਊ ਸੈਂਟਰਾਂ ਵਿਚ ਦਾਖਲ ਕਰਵਾਉਂਦੇ ਹਨ ਪਰ ਉਨ੍ਹਾਂ ਨੂੰ ਕੀ ਪਤਾ ਕਿ ਇਨ੍ਹਾਂ ਸੈਂਟਰਾਂ ਵਿਚ ਨੌਜਵਾਨਾਂ ਨੂੰ ਨਸ਼ਾ ਛੁਡਾਉਣ ਦੇ ਬਹਾਨੇ ਤੰਬਾਕੂ ’ਤੇ ਲਾਇਆ ਜਾਂਦਾ ਹੈ। ਸਮਾਜ ਸੇਵਕ ਪੂਰਨ ਸਿੰਘ ਸੰਧੂ ਰਣੀਕੇ ਨੇ ਇਨ੍ਹਾਂ ਪ੍ਰਾਈਵੇਟ ਨਸ਼ਾ ਛੁਡਾਊ ਸੈਂਟਰਾਂ ਨੂੰ ਸਖ਼ਤ ਸ਼ਬਦਾਂ ਵਿਚ ਤਾੜਨਾ ਕੀਤੀ ਕਿ ਬੰਦੇ ਦੇ ਪੁੱਤ ਬਣ ਜਾਵੋ ਨਹੀਂ ਤਾਂ ਸਾਨੂੰ ਤੁਹਾਡੇ ਖਿਲਾਫ ਕੋਈ ਠੋਸ ਕਾਰਵਾਈ ਕਰਨ ਲਈ ਮਜ਼ਬੂਰ ਹੋਣਾ ਪਵੇਗਾ।